Buah Jagoan Neon Serendongan/Senggani (Betawi Punya Cerita)
Betawi Punya Cerita SERENDONGAN (Jagoan Neon)
Lagi jalan -jalan ke Taman Forsa ngiat orang ngiat pu-un serendongan, jadi inget jaman dulu enyak suka masak teri pake kembang gituan,lah gurih bangat rasanya ampir sama ama kembang duren pokoknya bikin makan jadi dokoh dah.Pernah liat juga di daerah Cilangkap di taman kota, Taman Cempaka entuh buah pada di jualin, berarti entuh masing ada di kampung kita uman udah langka doangan.
Pu-un serendongan dulu mah banyak tumbuh di pinggir giwingan atawa pinggiran kali,demen bet ama buahnya nyeng udah mateng kita makan mulut ama lidah kita pada ungu.
Buah Serendongan bentuknya lucu masing muda warnanya ijo kemerahan pas udah mateng item keunguan,daon nya kalo kena kulit rada gatel soalnya ada bulunya,tapi kalo orang dulu mah entuh daon serendongan buat obat bisul biar cepet mecah,entuh bisul nyeng belon bemata dipopolin daon serendongan biar cepet mateng ama pecah.
Buahnya nyeng rada manis sepet bisa buat obat berak-berak entuh kata orang tua jaman dulu,kalo karang mah orang udah pada ogoan kaga mao obat begituan,puyeng dikit aja go pengenya pada ke dokter udah kaga demen ama obat petuah leluhurnya.
Resep bener orang kata metikin buah Serendongan,sambil ngiatain kebo pada guyang kita makanin entuh buah serendongan, kembangnya kita petikin dah kita taro ditudung cetok buat gremeng teri ntar sore.
Kalo nyeng lagi bedemenan kadang suka pada lenjeh entuh kembang serendongan nyeng rada glomohan berwarna merah jambu alias emping diselipin dah disela kuping demenan nya sambil bisikin ke kuping entuh demenan.
" Gua demen bet ama eluh" kata si cowok sambil mesem -mesem,lah entuh cewek nyeng dikata gitu,nunduk bae dah saking malu campur resepnya..
Sumber: Fb Bang ILok
(Lembaga Kebudayaan Orang Bekasi)