Bebawaan Lebaran Nyorog/Ngejot (Betawi Punya Cerita)

 

Kalo lebaran kurang atu ari entuh masyarakat kampung kita udah pada sibuk nyiapin buat datengnya hari lebaran ada nyeng sibuk andilan daging kebo,bikin kue,ngerebus tupat ama pada beli baju baru sementara entuh di langgar dan mesjid udah rame ama suara takolan bedug bocah. Sore arinya entuh orang udah pada sibuk ama nyeng namanya bebawaan (Nyorog/Ngejot) jalanan kampung penuh ama orang nyeng pada jalan kaki bawa tentengan atawa rantang isi olahan buat bawain orang tua dan sedara nyeng lebih tua.

Berasa bener hari entuh apalagi kalo takbir udah berkumandang di langgar dan mesjid, ampe terharu kaga berasa aer mata ampe netes. Biasanya kalo menjelang sore ari entuh baba kita udah pada gelar tiker dibale buat persiapan sedekah malem lebaran,dengan serebatan kaen baba nunggu bedug nunclo di bale sekalian nyambut ade,ponakan dan cucu nyeng pada dateng bebawaan.

Kalo ari lebaran paling berkah sodara paling tua,entuh nyeng namanya bawaan ampe kaga muat dimeja dapur,lah orang dulu pan anaknya banyak,tarolah anaknya sepuluh entuh baba bisa dapet sepuluh rantang,entuh baru dari anaknya doang belon dari ponakan dan misananya pokoknya entuh nyeng namanya semur kebo ama sayur kembili ampe kaga muat dipaso ,sudahan ikan tembang ama perek di jaketin mah ampe pada ngampar,entuh bocah pada demen gadoin ikan gabus kering ama bucak bacek,karena bucak bacek mah kudu dimakan ari entuh juga karena gampang basi,kalo semur daging dan sayur kembili bisa diangetin di tungku dapur dan makin diangetin makin nyerep rasa bumbunya.

Entuh orang bebawaan karena dulu mah pada jalan kaki dari sore ampe malem entuh orang masing pada ngalut kaya kaga ada berenti dan abisnya.Abis maghrib mulain dah entuh suara rencengan petasan mulai pada berodog nandain selamatan malem lebaran udah di mulai.
 
Suara berodogan petasan, suara bedug dan suara takbir berbaur ama suara orang lewat pada bebawaan bikin lebaran di kampung kita dulu begitu meriah dan syahdu,sekali lagi kalo malem takbiran dateng entuh aer mata kaga berasa pada ngembeng apalagi nyeng udah kaga punya emak ama baba sangat berasa sekali.

Itulah seinget ane waktu ane kecil saat lebaran tiba, Jika sekiranya kura boleh di tambahin di komentar.
 

Share this post